Plantun de Prouvènço

Pèr coumpara dos planto d'encò nostre

Scirpoides holoschoenus subsp. holoschoenus & Scrophularia vernalis

Scirpoides holoschoenus subsp. holoschoenus

Cyperaceae

Nom en français : Scirpe-jonc.

Descripcioun :
Aquelo planto èi troumpouso que sèmblo pulèu, à proumiero visto, à un jounc qu'à uno liandro (pamens i'a ges de tepalo e lou fru es un akène eici - un boursèu encò di Juncaceae). Autramen se recounèis à sis enflourejado (terminalo e faussamen sus lou coustat) en boulo surmountado pèr uno bratèio. La subsp. presentado eici, holoschoenus, se recounèis à sa bratèio courto (< 25 cm e souvènt bèn mens, e pounchudo) e lou noumbre de gloumerulo impourtant (mai que 5, e fin qu'à 30).

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Grando erbo
Taio : 0,3 à 1,5(2,5) m
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Scirpoides
Famiho : Cyperaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 1,5 à 3 cm
Flourido : Printèms - Estiéu

Sòu : Ca
Autour basso e auto : Pancaro entresigna
Aparado : Noun
Mai à avoust

Liò : Ribiero - Palun - Escoumbre e proche dis oustau
Estànci : Termoumediterran à Mountagnard
Couroulougi : Mediterrano-atlantico
Ref. sc. : Scirpoides holoschoenus subsp. holoschoenus (L.) Soják, 1972 (= Scirpus holoschoenus L., 1753 )

Erbo-dis-escrolo(-dóu-printèms)

Scrophularia vernalis

Scrophulariaceae

Nom en français : Scrofulaire de printemps.

Descripcioun :
L'erbo-dis-escrolo-dóu-printèms se rescontro dins lis esclargido, lis orle de bos e tambèn li prado à rousèu (megafourbié), majamen dins lis Aup Marino. Se recounèis eisadamen qu'èi la souleto à faire de flour jauno. Li fueio, en couor, dounon d'èr à li de l'erbo-de-l'aiet (Allaria petiolata). Sènso èstre sus listo roujo, la planto es aparado en Prouvènço.

Usanço :
Couneissèn pas d'usanço particuliero pèr aquelo planto. Poudèn pensa, que coume lis àutris erbo-dis-escrolo es empouisounanto. Escriéure au site se n'en sabès mai.